07.02., Buchs

Bevors mitm Umzug los gange isch, hemr fürs Volk es Ständli ghalte. D’Gmeind het es neus Glasfasernetz und het fürd Eröffnig es Fäschtli gmacht. D Bewohner:inne vo Buchs hend iz e schnälleri Leitig und mir händ defür mängisch die längeri 😁

Das Jahr simr de Umzug als alleinigi Gugge gloffe. D’Waynes hend mit ihrem Wage de musikalischi Abschluss gmacht. D Halle ade Chindrfasnacht für euse Uftritt isch pumpe volle gsi, richtig lässig so viel Publikum z’ha!

Mir hend es gmüetlichs Znacht im Restaurant Bergwerk igno und sind am Abig widr id Halle. D’Party mitm Motto Urziit gaht los. Mir hend euse Uftritt supr grockt und d’Lüüt hend de Plausch ka 💃🕺

19.02., Stiftung Vivendra

Bevor’s ines längers Fasnachtswuchenend gaht, simr wie jedes Jahr bide Stiftung Vivendra igalde gsi. D’Bewohner:inne und die Mitarbeitende hend uh Freud ah eusere Musig ka. So guet, dass d’Desi gad es paar Schlagzügschlägr ane Bewohnerin verschenkt het 🤩

Als Dankeschön hemr leckere Härdöpfelsalat und Fleichchäs becho. Zum Dessert hets Berliner und Fasnachtschüechli gäh. Dasmal ohni Hänsel und Gretel Spur wie im Proberuum 🤓

21. + 22.02., Wädenswil

Das Jahr simr mal widr an Nachtumzug in Wädenswil. Z’erst hets nach Rege usgseh, s’het zum Glück gliechtet und am Abig isch’s mehrheitlich troche gsi. Bim Istah für de Umzug hemr vom Wage vore dra e Banane als Zwüscheverpflegig becho und s’Trinke hemr imene Wage hindr eus gfunde. So macht s’Istah Spass 🥂

De Umzug isch lässig gsi, ganz viel Lüüt am Strasserand. Schöni Stimmig, so im Dunkle! Nachm Umzug sind es paar go versueche vorzschlafe ide Turnhalle und die andere sind uf d’Gass die andere Guggene go lose.

Am Sunntig simr miteme leckere Zmorge Buffet vom nfg Wädi verwöhnt worde. Gstärcht hemr eus gschminkt und ide Turnhalle parat gmacht für de Grossi Umzug am Nami. Bi strahlendem Wetter und es biz Wind simr die glich Strecki wie am Abig vorher gloffe. 

Nachm Umzug hets es paar Gugge-Konzert ufm Konfetti-Platz gäh. Mit es bizeli Verzögerig hemr vom treue Publikum viel Applaus becho. Mir händ Komplimänt becho, dass mir so e tolli Usstrahlig händ und so positiv sind. Dass nämemer gern mit Hei 🤩

28.02., Niederweningen

Wuuupwuuup eusi Heimfasnacht staht ah! Hüt chömer zeige, wie lässig mir sind und was mer chönt, ide Hoffnig neui Mitglieder zfinde. De Start isch schomal guet, mir sind s’Nr. 1 gsi 🤗

De Umzug ist wegm Bus stockend vorah gange. Mir hend d’Laufpause gnutzt zum em begeisternde Publikum jewiils es Platzkonzert z’gäh. Sie und mir hend alli fest Freud ka! Nach dem lässige Umzug hets mit de andere Gugge zäme es Monsterkonzert gäh. Wie genial das isch, so all mitenand z’spiele!

Nachm leckere Esse im Kafi WANO simr gstächt i euse Barisatz id Halle gange. D’Sandra, de Röbi und d’Julia sind ide Aulabar gsi und die andere vorne ide grosse Halle. S’isch viel gloffe, glichzitiig hets ab und zue glanget fürs es Tänzli hindr de Bar 🥳 De FC Niederweningen het Freud ah eus ka und eus hets au widr mega Spass gmacht! Mir freuet eus scho ufs negste Jahr. 

08.03., Weiningen

It's the final countdown! Ja de letschti Uftritt für das Jahr isch ahbroche. Weiss gar nöd woni sell ahfah mi verzelle.... ah doch! Cremeschnitte, Vermicell, Sandwich, etc. Gschminkt wird im Proberuum mit de Chind, egal ob 4 oder 2 beinigi. S Wätter isch wie immer wunderprächtig gsi! Öpper hät schliesslich mal gseit, dass mir eh Schönwätter-Gugge sind 😎

Das isch mit Abstand de heisseschti Umzug gsi! Eusi Gwändli sind nid für so viel Sunnestrahle gmacht haha Drum hemr denn s Konzert im Aschluss im T-Shirt gmacht, das isch au ä Premiere gsi. Übr es paar Verpatzer hemr als Gruppe chöne lache, s’Publikum wüsst ja eich nid, wie’s sust wür töne 😁

Mir hend d’Festwirtschaft vom Eltereverein Weiningen i volle Züg gnosse, s’isch jedes Mal äs Festmahl. 

Merci vielmal

Es grosses Dankeschön ah alli Kommittees fürd Iladige und d’Gastfründschaft.

Und es riesigs Danke ah alli Zuschauer, für eue tossende Applaus!

Vo Herze es rigorosses Dankeschön ah alli Mitglieder vode Gugge. Inere Chlii-Formation git jede Vollgas und mr hend die Saison au mit Chrankheits- und Arbeitsusfäll grockt 🥳

Neumitglieder

Mit de Begeisterig wo mir im Publikum i allne Ort gspürt hend, hoffe mr, dass es de eint odr die andr küzlet het, zum bi eus mal ine Prob go ine lose z'cho. Mir freuet eus übr all Afrage und dass mr eusi Gruppe chli vergrössere chönd 🥰

Nachere lässige und neu gliederete Saison, zumindest was eusi Uftrittsdate betrifft, hemr hüt eusi GV ghalte. Es isch so schön gsi, nach 2 Mönet alli widr z'treffe und zäme z'cho. Nach de Sitzig mit wundrschön beschriebenem Jahresbricht, hemr im Aschluss feins Esse mit Grillguet, Salät und Dessert gnosse 🤓

Mir hend  bereits übr d'Tourdate 2025 / 2026 gret. Im Verlauf vom Summer werde mr euse Plan finalisiere. Du chasch gspannt bliibe, was für die negst Saison folgt!

Mir wünschet eu en wundrschöne Summr. 

Am Dunnstig, 9. Januar 2025, sind ihr uf die 8ti (20 Uhr) iglade ade Früeblistrasse 7 in 8157 Dielsdorf i eusere offene Prob go ine zluege und zlose. Egal wie alt oder jung du bisch oder dich fühlsch 😊

Meldet eu ah via Kontaktformular oder E-Mail, au wenn ihr Frage hend.

Mir freuet eus uf neui - oder au bekannti 😁 - Gsichter! 

Mir hend es erfolgsriichs Probewuchenend ide sunnige Innerschwiiz gnosse. Mir hend neui Lieder igstudiert und s'bestehende Repetoire ufgfrüscht. Es isch suprlässig gsi!

Eusi Tour für die kommendi Saison staht fest:

 Saison 2024/2025

Da findet ihr eusi Tourdate!

Eusi Probe gönd wieder los. Mir freuet eus uf neui Gsichter!

Eusi Tourdate für 2023/2024 sind online :)

Mir probe wieder!

Du möchtsch verbii cho?

Mir freuet eus uf dich :)

Eusi Tourdate sind öffentlich. 

Ihr treffet eus ah folgende Ort ah:

04.02.2023, Buchs ZH

18.02.2023, Ryfälde AG

25.02.2023, Wädenswil ZH

50.03.2023, Weinigen ZH

Mir freuet eus bekannti und neu Gsichter zgseh und mit ihne e geniali Fasnachtsziit z'erlebe.

 Neu probe mir am Dunnstig.

Mir hend euse Probetag gwechselt. Vielleicht passt dir de neui Tag bessr? Meld dich bi eus und chum verbii zum mit eus z'musiziere!

Mir freuet eus :)

Es esch sowit: Mir chöne wieder probe!

Au wenn mir eus zumene frühnere Ziitpunkt dezue händ müese entscheide eusi Tour abzsäge, probe mr ab iz wieder jede Zischtig.

Für eus.

Für de Spass.

Für euse Zämmehalt.

Mir freuet eus, dass mir weder chönd musiziere und vielleicht gsehnd mr die einte odr andere ade Fasnacht!

Liebi Fasnächtler und Fründe

Ufgrund vode aktuelle Lag hend mir eus schweren Herzens entschiede zum d'Uftritt abzsäge. Es fallt eus nid liecht, die Saison nid z'spiele, eues Lache nid z'ghöre und eu nid tanze z'gseh. Mir informiert eu, sobald mr wieder trümmelnd, trötend und musikalisch undrwegs sind.

Wir wünsche euch e gueti Ziit.

Bliibet gsund und bis bald! 

Eui Chalchsteibrächer Wehntal

❤🎺 Der Tag war anstrengend, aber sehr lehrreich und hatten auch sehr viel spass 🎺❤

Das Musizieren mit einer Gugge ist nicht nur spielen und nach Hause gehen .

Es ist weit aus mehr als nur Das!

Gute Gespräche, miteinander vorran kommen.

Neue Ideen sammeln, ausprobieren und kreativ sein.

🎶Wir bedanken uns bei allen, die dabei waren und mit geholfen haben.🎶

❗🌟Ihr seid super🌟❗

!!!!!Hello Liebi Lüüt!!!!!

!!! Mer händ e Probetag!!!

Hettisch intresse zum gri z`Lose?

Möchtisch du Instrument kenne lerne?

Oder spielsch scho selber es Instrument und möchtisch mit Probe?

!!! Dääänn chum verbiee!!!

Es sind ALLI willkomme,

!! Ob chli oder gross !!

Save the Date: Samstag 23.10.2021

Wo: Schützenstube Oberwenigen (Gattikerweg)

Nur mit Voranmeldung, wegen der bekannten Situation.

Meld dich doch bi üs per E-Mail oder Handynummere.

!!!!! Mer freued eus uf üüch!!!!!

Mer fönd a Probe!

Die neui Saison chan starte :-)

Probe vode Chalchsteibrächer vot am DI 13.10.2020 ah. Das all 2 Woche bes ändi Johr.

Wer gärn möcht cho ieluege döf das jederzit mache.

Mer Probe bes etz emmerno en Dielsdorf ab 20.00Uhr.

Mer wönsche allne e guete Start i die neui Saison.

Euchi Chalchsteibrächer

Schweren Herzens müemer eu mitteile, dass eus leider 4 Mitglieder verlönd.

Andy, Nevita, Sabrina ond Johanna… mer Danke euch ganz härzlich, für die schöni Zit, womer met euch händ dörfe verbringe. Jede einzelni Stei vode Chalchsteibrächer hoffe, dass mer eus aber glich no s eint oder andermol gsänd, ade Fasnacht oder au sunst.

Danke euch!

Mer händ aber natürlich au e freudigi Nachricht!

Mer dörfe i eusem Steihufe au 2 neui Stei begrüesse.

Es riise HALLO Manu und Ernst.

Mer freue eus, euch be eus ide Truppe offiziell dörfe ufzneh ond met euch vell spannendi und lostigi Momänt dörfe zerläbe.

I dem Sinn chan jo die nöchst Saison starte!

Euchi Chalchsteibrächer

Niederweniger Fasnacht findet statt!!!

Mer send hüt azträffe in Niederwenige.

Mer freue eus riisig :-)

Spielzite für de Rorbaser Maskeball send bekannt!!!

Mer freue eus uf jedes Gsicht womer dörfe döt gseh :-)

Hallo Mitenander

Mer händ vernoh dases scho diversi Diskusione geh het bezüglich eusem volständige Name, dorom möchte mer gärn do en erklärig abgeh wie das ganze entstande esch.

Wie der evt scho händ chöne noläse send mer Chalchsteibrächer e Fusion us 2 ehemalige Guggene.

De Name hämmer usgsuecht uf grund das em Wehntal, resp. im Bezirk Dielsdorf es grosses ufkomme vo Chalchstei het. Dorom Chalchsteibrächer.

De Standort Dielsdorf hämmer gwehlt wel die einti Gugge vo dene 2 Fusionierte Guggene de Standort scho döt gha händ. Da sehr vell arbet hinder dere Fusion steckt hämmer eus dezue entschlosse en Standort zwehle für eusi Probene wo scho vorhande esch.

Mer wöse das Dielsdorf ned im Wehntal esch, doch sgrösste Chalchstei vorkomme esch em Wehntal daher hämmer de Name so gwehlt.

Be witere Froge dörfeder gärn eus Kontaktiere.

Liebe Gruess

Euri Chalchsteibrächer

Du möchtisch gärn mol be eus ieluege?

Das esch keis broblem, mer händ am Di 14.1.20, 20.00 Uhr en offni Prob für euch.

Eifach ieluege met oder ohni amäldig.

Amälde oder au wender froge händ eifach uf FB, Insta oder under [email protected] mälde.

Mer freue eus uf jedes Gsicht womer dörfe begrüesse ond wo eus velecht scho spontan möchte onderstötze be eusere Prob oder au eifach mitspiele.

Chömed eifach verbi zu eusem Probelokal ade Früeblistrasse 7, 8157 Dielsdorf

Mer hoffe bes am 14.1.20!

Euri Chalchsteibrächer